એક તું...

મારા હરેક સવાલનો જવાબ છે તું,

નિશદિન આવતું એક ખ્વાબ છે તું.

હું એક ઘનઘોર વાદળ જેવો રખડુ,

વાદળ સાથે રમે એ મહતાબ છે તું.

તરસ્યો હું સાવ સહરા જેવો સદાનો,

તું હેતની હેલી,ઇશ્કનો સૈલાબ છે તું.

હું રહ્યો કંટક જેવો કઠોર, સાવ સુકો,

સદા ય મહેકતું ગહેકતું ગુલાબ છે તું.

નાકામ કવિના અધૂરાં શેર જેવો હું,

ગઝલનાં ગુલદસ્તાની કિતાબ છે તું.

તૂટેલ આઈના જેવો વેરણછેરણ હું,

દર્પણમાં ન સમાય એ શબાબ છે તું.

મારી જિંદગીના સરવૈયે હતી ઉધારી,

ને નફા ખાતે લખાયેલ હિસાબ છે તું.

મયખાના પયમાના સાવ નકામાં મારે,

આંખોથી પીવું ને ન ઊતરે શરાબ છે તું.

કંઈ નથી ખપતું હવે નાદાં નટવરને,

વિભુની દુઆ, ખુદાનો ખિતાબ છે તું.