વાત કરો...

કદીક અટકી ગયેલ સમયની વાત કરો;

ને આંખોથી છલકાતા મયની વાત કરો.

મળી ચાર નજર, થઈ એ એક અચાનક;

અને ચાર આંખોમાં વિસ્મયની વાત કરો.

ભલે રહ્યા અલગ અલગ બે ઘાયલ દિલ;

એમાં થતા એક સરખાં લયની વાત કરો.

દિલ હારી જીતી છે થોડીક મુલાયમ પળો;

ને પછી થયેલ ભવ્ય પરાજયની વાત કરો.

જો નથી ગમતી તમને મારા ઇશ્કની વાતો;

તો તમને ગમતા કોઈ પ્રણયની વાત કરો.

ઊકેલતા ઊકેલતા ઊકેલ્યા છે હર કોયડા;

ન ઉકેલાયેલ જિંદગીના પ્રમયની વાત કરો.

તમારા નામે જ હરદમ ધબકે છે દિલ મારું;

તમે તમારા ઘાયલની હ્રદયની વાત કરો.

જિંદગીમાં કોઈ એક અજનબીનાં આવતા જ;

એક પછી એક રચાતા વલયની વાત કરો.

કોઈના પર મરી મરી જીવી રહ્યો છે નટવર;

પ્રેમમાં ય થતા કદી કદી પ્રલયની વાત કરો.