ઉન્માદ કર્યો...

છેક એવુંય નથી કે એમણે મને બરબાદ કર્યો;

બસ, એમનાં ખાસ ખાસમાંથી મને બાદ કર્યો.

જાલિમે કરી સજા ઉમ્રકૈદની દિલમાં પૂરી મને;

ને ઝુલ્ફની મજબૂત જંજીરમાંથી આઝાદ કર્યો.

હશે એમની ય કોઈ મજબૂરી,જે હશે બહુ બૂરી;

અલગ થતાં, ન તો એમણે કોઈ વિવાદ કર્યો.

કેટલી ય વાર ઝબકીને જાગી જાઉં છું હું રાતે;

ભાસ થયા રાખે છે મને,એમણે મને સાદ કર્યો.

લાખ લાખ ગમો વચ્ચેય ક્યારેક હસી લઉં છું;

અચાનક આવતી એમની યાદે અહલાદ કર્યો.

આંખ મારી વારે વારે ફરકી જાય છે અમસ્તી;

સાત સમંદર પાર જરૂર એમણે મને યાદ કર્યો.

વગર વાદળે કેટલી ય વાર તરબતર થયો છું;

વિરહમાં મારા એમણે આંસુંઓનો વરસાદ કર્યો.

ઇશ્કની જ અસર છે કે મારા આંસુ વધુ ખારા છે;

એમની યાદમાં આવતાં આંસુંનો મેં સ્વાદ કર્યો.

મને યાદ કરતા કરતા સાવ વીસરી ગયા મને;

દોષ મારો જ કે, મેં સાવ ખોટો અવસાદ કર્યો.

લખતાં લખતાં એમ નથી લખી શકાતું નટવર;

લખાય ત્યારે જ જ્યારે લાગણીએ ઉન્માદ કર્યો.