એનો નથી મળતો દોસ્ત મને તાળો;
ઉનાળામાં જ ખીલે છે કેમ ગરમાળો?
જ્યારે જ્યારે આયનામાં મેં જોયું છે;
પૂછે મને, તું માણસ છે કે તરગાળો?
ન શોધશો મને તમારી આસપાસમાં;
બસ, તમારાં દિલમાં જ મને ભાળો.
દરદ-એ-દિલની શી મસ્ત મજા છે?
કેવી રીતે જાણે એ પેલો ઉપરવાળો?
રકમ જ ખોટી હતી મારા દાખલાની;
હતી એ બાદબાકી, કર્યો મેં સરવાળો.
તમને ભૂલવાના કરું છું ભારે પ્રયત્ન;
ખ્યાલોમાં આવી ન કરો કાંકરીચાળો.
છું સાવ પ્રવાહી જેવો હું પણ સનમ;
જેવા રૂપમાં ઢાળવો હોય, મને ઢાળો.
તમારા એક વચન પર જીવી રહ્યો છું;
કહ્યું હતું મળવાનું, બસ એ તમે પાળો.
ખોટી વાહ વાહ મારી રહેવા દે દોસ્ત;
જાણું છું મનોમન તું દે છે મને ગાળો.
સપનાં તો હંમેશ હું રંગીન જ જોઉં છું;
ભલે હોય મારી હર રાત્રિનો રંગ કાળો.
થવાનું હોય એ થઈને રહે છે નટવર;
ગમે એટલું ય દોસ્ત, તમે એને ટાળો.
ટિપ્પણીઓ નથી:
ટિપ્પણી પોસ્ટ કરો
આપના હર સુચનો, કોમેન્ટસ આવકાર્ય છે. આપનો એ બદલ આભારી છું