સનમ વારે વારે તમે મને શીદ આમ ચકાસો?
છે મારા વિના કેવી તમારી હાલત એ તપાસો.
પૂછતા પૂછતા તમે પૂછી લીધું કેમ જીવો છો?
શું કહું સનમ?ગણી ગણી
લઈ રહ્યો છું શ્વાસો.
હાથે કરીને હારી ગયો હું જીતની બાજી મારી;
એમ તો મારી પાસે પણ હતો શકુનિનો પાસો.
રૂબરૂ મળવાની કરતા રહ્યા હંમેશ આનાકાની;
ને સપનામાંય ન મળવાનો મોકલ્યો છે જાસો.
લાખ લાખ જાણીતા લોક સાવ અજનબી બને;
જ્યારે એક માસૂમ ચહેરો ગમી જાય છે ખાસો.
જિંદગી આખી જીવી જઈશ હું ય તમારા વિના;
બસ જતા જતા દેતા જાવ દિલથી મને દિલાસો.
ખુદની કેદ જેમાં હું કેદ, છે મારામાં એટલો ભેદ;
કહો યારો,
કેવી રીતે તમે ખુદથી જ દૂર નાસો?
પ્રભુ હવે મને થવા લાગ્યો છે તારા પર અંદેશો;
ધરમને નામે માનવે બિછાવી છે કેટલી લાશો?
મંજિલ નથી રસ્તો નથી નથી કોઈ મુકામ હવે;
હોય છે નટવર એવા જિંદગીમાં ઘણા પ્રવાસો.
ટિપ્પણીઓ નથી:
ટિપ્પણી પોસ્ટ કરો
આપના હર સુચનો, કોમેન્ટસ આવકાર્ય છે. આપનો એ બદલ આભારી છું