એ જ વાતનો થોડો થોડો ખેદ છે;
મને ખુદ સાથે થોડો મતભેદ છે.
મુક્ત ફરતો રહે હર આદમી અહીં;
અને આમ જુઓ તો ક્યાંક કેદ છે.
કુરાન ગીતા બાઈબલને શું કરું?
એની આંખોમાં મારો ઋગ્વેદ છે.
છે મારું જમણું એ બતાવે છે ડાબું;
આયનાની નજરમાં ઘણાં ભેદ છે.
દરદની પીડા ય સુરિલી હોય છે;
એથી શ્યામની બંસરીમાં છેદ છે.
નિશાએ સવાર માટે શ્રમ કર્યો હશે;
ઝાકળ બુંદ કંઈ નથી, પ્રસ્વેદ છે.
હર શખ્સ એમ જ જીવી રહ્યો છે;
કાલે સહુ સારું થશે એને ઉમેદ છે.
એમણે નજરોથી દૂર કર્યો છે મને;
મારા માટે બહુ કપરો
ઉચ્છેદ છે.
નિસાસાઓ સાવ નિઃશેષ નથી;
આંસું વડે ભાગતા બચેલ છેદ છે.
લખી સાવ નાની કવિતા નટવરે;
સમજો જો દિલથી તો એ વેદ છે.
ટિપ્પણીઓ નથી:
ટિપ્પણી પોસ્ટ કરો
આપના હર સુચનો, કોમેન્ટસ આવકાર્ય છે. આપનો એ બદલ આભારી છું