ખોટું થયું ત્યાંથી એ ફરી ગણીએ;
ચાલો, એક નવો જ પાઠ ભણીએ.
એક સાંધો સંબંધ ત્યાં તેર તૂટે છે;
એક ગાંઠ વિનાનો સંબંધ વણીએ.
રેત ઈંટ સિમેન્ટ તો બનાવે મકાન;
મકાનોના વનમાં એક ઘર ચણીએ.
હું કોણ તું કોણ એ કોણ પેલો કોણ?
જવા દો સવાલો, ‘હું’ પદને હણીએ.
સપનાંના કરી વાવેતર આંસુ સિંચી;
એક નવો ખુશનુમા ખયાલ લણીએ.
હળી મળી ભળી અલગ થયા છીએ;
ગીત જુદાઈનું ય હસીને ગણગણીએ.
થતા થતા એ પણ થઈ જશે નટવર;
કરીએ ક્રાંતિ આપણે કલમની અણીએ.
ટિપ્પણીઓ નથી:
ટિપ્પણી પોસ્ટ કરો
આપના હર સુચનો, કોમેન્ટસ આવકાર્ય છે. આપનો એ બદલ આભારી છું