નથી...

વાત એમ તો કંઈ સાવ અજાણી નથી;

આંસુ કંઈ  ફક્ત સલાઈન પાણી નથી.

સમજનારા સમજશે  શાનથી સાનમાં;

મૌનથી મોઘમ બીજી કોઈ વાણી નથી.

પીશો તો  સમજાશે મતલબ પ્યાસનો.

કોણ કહે છે ઝાંઝવાની સરવાણી નથી?

ભલભલાં કપરાં દર્દ પણ પીસાય જાય;

સમયના ચક્રથી કુશળ કોઈ ઘાણી નથી.

પ્રેમીને ને પ્રેમને સમજતા વાર લાગશે;

દુનિયા ભલે ડાહી છે, પણ શાણી નથી.

ઊજવતાં આવડવું જોઈએ દોસ્ત મારા;
જિંદગીથી ભવ્ય બીજી કોઈ ઉજાણી નથી.

સાથ છે સનમ, તારો મારો ભવોભવનો;

ભલેને હાથમાં મારા તારો પાણિ નથી.

તારાં જ બનાવેલ હવે તને બનાવે પ્રભુ;

માનવથી વિચિત્ર બીજું કોઈ પ્રાણી નથી.

મારી વાર્તા પણ જરાક જુદી દોસ્ત મારા;
એમાં રાજા તો છે પણ કોઈ રાણી નથી.

સાવ ઠાલી વાહ વાહ ન કરો નટવરની;

તમે મારી કવિતા વાંચી છે, માણી નથી.