સંગત

ધીરે ધીરે ગમવા લાગશે આપને ય મારી સંગત;
ને તમે કાનમાં મારી કહી દેશો વાત એક અંગત.

થતા થતા થઈ જશે ઇશ્ક તમને ય મારી સાથે;
ને શ્વેત શ્યામ જીવનમાં આવી જશે નવી રંગત.

યાદમાં તમારી એટલો તડપ્યો હર પળ નિશદિન;

સ્યાહીથી નથી, આંસુથી લખ્યો છે મેં પ્રેમનો ખત.

આજે ભલે અવગણ્યો છે મને તમે હસતા હસતા;

રડશો યાદમાં મારી કદી, થશે અશ્કની ય અછત.

આપની આંખોમાં રહેવાનું જો મળે એક પળ મને;

શું કહું સનમ? જીવતે જીવ મને મળી જાય જન્નત.

આ જનમ,નહીં સાત સાત જનમ મળતો રહીશ હું;

માનો ન માનો,મારા ઇશ્કમાં સનમ, છે એટલું સત.

મારી એકલાની મનીષા ન પુરી થાય એવું ય બને;

મળવા મને જન્મોજનમ, તમે ય રાખો કોઈ મન્નત.

પ્યાર શું છે કોને ખબર પડી? મને પડે, તમને પડે;

હું એટલું જાણું, થઈ જાય ઇશ્કમાં એકબીજાની લત.

આખરી વેળા ઓઢાડી જજો કફન રંગિન ચૂંદડીનું;

નહીંતર જીવ નટવરનો જતા જતા જશે અવગત.