વાતો કેટલી ય અકબંધ રાખીને ફરે છે આજનો માણસ;
ન જાણે કેમ આંખો બંધ રાખીને ફરે છે આજનો માણસ.
એક પણ સગપણને થવા દેતો નથી ઘટ્ટ એ આજકાલ;
પાણીથી પાતળા સંબંધ રાખીને ફરે છે આજનો માણસ.
પાંગરતા પુષ્પની સુવાસ માણવાની આદત વીસર્યો છે;
અત્તરની બાટલીમાં સુગંધ રાખીને ફરે છે આજનો માણસ.
સુખમાં કે દુઃખમાં છલકાવા દેતો નથી એ કદી આંસુંઓને;
એની પાંપણે મજબૂત બંધ રાખીને ફરે છે આજનો માણસ
છે એવો એ કદી દેખાતો નથી ને દેખાવા દેતો નથી એ;
અવનવો દેખાવા પ્રબંધ રાખીને ફરે છે આજનો માણસ.
સુખને સમજતો નથી, મળે ત્યારે ભોગવતો નથી એ કદી;
ને વેદનાનો નિબંધ રાખીને રાખીને ફરે છે આજનો માણસ.
સાચી વાત કહો તો સમજતો નથી, સમજાવતો નથી એ;
સાથે કેટલાં ય મિત્રો અંધ રાખીને ફરે છે આજનો માણસ.
ન કર ફિકર નટવર તું તારી લીલીછમ લાગણીઓની;
હવે ક્યાં કોઈ ઋણાનુબંધ રાખીને ફરે છે આજનો માણસ?
ટિપ્પણીઓ નથી:
ટિપ્પણી પોસ્ટ કરો
આપના હર સુચનો, કોમેન્ટસ આવકાર્ય છે. આપનો એ બદલ આભારી છું