જેમ જેમ તન્હાઈનો વિસ્તાર વધતો જાય છે;
એમ મારા ચહેરા પર નિખાર વધતો જાય છે.
આંખો ખુલ્લી રાખું છું હરદમ મારી હવે દોસ્ત;
ખુલ્લી આંખોનાં સપનાંનો ભાર વધતો જાય છે.
જેને જેવો લાગ્યો એવો ચીતર્યા કર્યો અહીં સૌ;
કહેવાય એ નિરાકાર ને આકાર વધતો જાય છે.
કરતા રહ્યા નફરત સનમ મને હદથી વધીને;
એમ એમના પ્રત્યે મારો પ્યાર વધતો જાય છે.
પડી જ્યારે જ્યારે નજર એ હસીન ચહેરા પર;
ત્યારે ત્યારે શરમનો શણગાર વધતો જાય છે.
અખંડ દીવો સળગાવ્યો દિલમાં કોઈના પ્યારનો;
દિવા તળે ન જાણે કેમ અંધકાર વધતો જાય છે.
સથવારો શબ્દનો મળ્યો તો સારું થયું નટવર;
લાગણીઓ સાથે મારો વહેવાર વધતો જાય છે.
ટિપ્પણીઓ નથી:
ટિપ્પણી પોસ્ટ કરો
આપના હર સુચનો, કોમેન્ટસ આવકાર્ય છે. આપનો એ બદલ આભારી છું