તારી તારીફ

તારી તારીફ કરું એમાં કોઈ બુરાઈ નથી;

તું તો છે મારી સનમ, કોઈ પરાઈ નથી.

હર જગાએ મને તું અને તને હું દેખાઉં;

ઇશ્કમાં તો આ કોઈ મોટી નવાઈ નથી.

હું તને ચાહું વધારે કે તું મને ચાહે વધુ;

આપણી વચ્ચે આવી  કોઈ લડાઈ નથી.

તું મારા દિલમાં ધબકે, હું તારા દિલમાં;

છીએ અલગ ને આમ કોઈ જુદાઈ નથી.

અરીસો તૂટી ગયો છે અધૂરી ઇચ્છાઓનો;

મનીષા એકે હજુ ય જરાય તરડાઈ નથી.

ન જાણે કેમ વરસે અનરાધાર આ આંખો;

જોકે ઘટા ઘનઘોર ગમની છવાઈ નથી.

બુઝાવી શમા ઊઠી ગઈ તું  એવી રીતે;

મહેફિલ ફરી કોઈ  દિલમાં ભરાઈ નથી. 

લખી મેં તારી યાદમાં કેટલી ય નજમ;

લખવી જોઈએ એવી હજુ લખાઈ નથી.

વેશ ભજવતા હર કોઈ થઈ જાય નટવર;

દોસ્ત,આ ભવથી મોટી કોઈ ભવાઈ નથી.