મારા ભવિષ્યનો એક દસ્તાવેજ છે.
સાથ એમની મસ્ત હુશ્નનું દહેજ છે.
નથી કરતા એઓ જરા ય શૃંગાર;
ચહેરા પર ખૂબસૂરતીનું તેજ છે.
હોઠોથી કંઈ કહેવાની જરૂર નથી;
બે અફીણી આંખો બધું કહે જ છે.
લાગણીઓ મારી સાવ પ્રવાહી છે;
એ જો વહેવાની હોય તો વહે જ છે.
ગયા સનમ જ્યારથી તમો અહિંથી;
સવારે ઊગતો સૂરજ નિસ્તેજ છે.
ધૂંધળું આવે છે નજરે હર કંઈ;
એમની યાદમાં આંખોમાં ભેજ છે.
એમને હું વિચારતો રહું છું હરદમ;
એમનું મને યાદ કરવાનું સહેજ છે.
જોયું છે જ્યારે જ્યારે આયનામાં;
એ કહે મને તું તો જે છે તે જ છે.
મરીઝ-એ-ઇશ્કની નથી કોઈ દવા;
ને ઉપરથી આંસુંઓનો પરહેજ છે.
કેવી રીતે આવે નીંદર હવે મને?
એમના સુંવાળા સપનાંની સેજ છે.
હળવેથી ઊંચકશો જનાજો મારો;
દેહમાં મારા સંવેદનાઓ સતેજ છે.
થાક્યો છે નટવર વખતને પડકતા;
ઓ સમય, તારી ગતિ બહુ તેજ છે.
ટિપ્પણીઓ નથી:
ટિપ્પણી પોસ્ટ કરો
આપના હર સુચનો, કોમેન્ટસ આવકાર્ય છે. આપનો એ બદલ આભારી છું