ભલે રહે દૂર દૂર પણ થોડો લગાવ રાખ;
સપનામાં તો સપનામાં, તું આવજાવ રાખ.
કોણ જાણે ક્યારે આવી ચઢે ભરતી રણમાં;
બળબળતાં રણના કિનારે તારી નાવ રાખ.
ગમવા લાગશે પ્યારમાં પડેલ હર જખમ;
એક મનગમતો હરદમ દૂઝતો ઘાવ રાખ.
વહી જશે લાગણીના પુરમાં જિંદગી ક્યાંક;
ઉછાળા મારતી લાગણીઓ પર દબાવ રાખ.
નદી નાવ અને સંજોગ બદલાતા રહે હંમેશ;
ભરતી અને ઓટમાં સરખો તું સ્વભાવ રાખ.
જિગરમાં હોય જખમ,દિલમાં હોય ભલે દર્દ;
ચહેરા પર નટવર ખુશીના તું હાવભાવ રાખ.
ટિપ્પણીઓ નથી:
ટિપ્પણી પોસ્ટ કરો
આપના હર સુચનો, કોમેન્ટસ આવકાર્ય છે. આપનો એ બદલ આભારી છું