જરૂરી છે...

જીવવા માટે અનેક કારણ જરૂરી છે,

હું પણ જરૂરી છું ને તું પણ જરૂરી છે.

એમ તો સૌ એકલાં જ મરી જાય છે,

પણ જીવવા કોઈ ખાસ જણ જરૂરી છે.

પ્યાસ સહરાની લઈને ક્યાં ભટકાય?

મૃગજળને પીવા ય એક રણ જરૂરી છે.

રોજની રામાયણ તો આજે ય થાય છે,

કોઈ ઇચ્છાનું માયાવી હરણ જરૂરી છે.

જિંદગી સાથે રહી અજાણ્યા રહી જવાય,

ઓળખાણ માટે બસ,એક ક્ષણ જરૂરી છે.

ગઝલ લખતા લખતા તો લખાઈ જાય,

મરમ એનો માણવા સમજણ જરૂરી છે.

દોસ્ત યાર સનમને ય જાણવા નટવર,

ક્યારેક ખરી કે ખોટી ચણભણ જરૂરી છે.

જરૂરી છે...

વાત દિલની સમજવા એક સનમ જરૂરી છે;
મૂલ્ય હાસ્યનું સમજવા આંખો નમ જરૂરી છે.

ઉદાસીનું કોઈ ખાસ કારણ નથી હોતું યારા;
ક્યારેક અમસ્તાં ય જિંદગીમાં ગમ જરૂરી છે.

કોઈ આપણું થતા થતા રહી જાય છે ક્યારેક;
તો ય એ આપણું જ હોવાનો ભરમ જરૂરી છે.

આ તન તો આજે છે તો એ કાલે ન પણ હોય;
ઇશ્ક કરવા ઓ સનમ,મનનો સંગમ જરૂરી છે.

ખુદા છે કે નથી  એ તો બસ ખુદા જ જાણે છે;
તો ય દિલને બહેલાવવા એક ધરમ જરૂરી છે.

હાથ તાળી મિત્રો હાલતા ચાલતા મળી જાય;
એમાંથી ઓ યાર,એકાદ મિત્ર પરમ જરૂરી છે.

ક્યારેક એક ભવ ઓછો પડે છે કોઈને ચાહવા;
ત્યારે આ જ ભવમાં ય બીજો જનમ જરૂરી છે.

હું ક્યાં કહું કે તમે મારા સિવાય કોઈને ન મળો;
પણ જ્યારે મળો, તમારે ચહેરે શરમ જરૂરી છે.

દુઆ કરૂં  દિલ તમારું ધડકતું રહે મારા વગર;
તોય હર ધડકનમાં નટવરની સરગમ જરૂરી છે.