શનિવાર, 24 માર્ચ, 2018

મળો કોઈ કારણ વિના...

હવે મળો તો મળો કોઈ કારણ વિના,
ને છૂટા પડો તો કોઈ ચણભણ વિના.

ઇશ્ક તો ઇશ્ક જ છે,  ન પર્યાય એનો,
ઇશ્ક કદી ન થાય કોઈ સમર્પણ વિના.

જો આપની કેફી આંખમાં નજર આવું,
જિંદગાની આખી વિતાવું દર્પણ વિના.

થોડું દિવાનાપન પણ જરૂરી ઇશ્કમાં,
ઇશ્ક ન થાય કદી ય ગાંડપણ વિના.

આપે જો મને ભૂલવું જ હોય તો ભૂલો,
હું કેવી રીતે જીવું તમારા સ્મરણ વિના?

મારા હાસ્યથી છેતરાય ન જશો દોસ્તો,
રડ્યો છું આંખમાં આંસુનાં દ્રાવણ વિના.

રામ રામ ભજતા ભક્તજનો ય જાણે,
રામાયણ ન થાત કદી ય હરણ વિના.

જિંદગી એવી કે,ન માંગે દોડતી આવે,
જિંદગી ક્યાં જીવાય છે પળોજણ વિના?

જેવો છે એવો  નજરે આવે છે નટવર,
ફરે છે ચહેરા પર કોઈ આવરણ વિના.

ટિપ્પણીઓ નથી:

ટિપ્પણી પોસ્ટ કરો

આપના હર સુચનો, કોમેન્ટસ આવકાર્ય છે. આપનો એ બદલ આભારી છું