આ કાલ પરમ અને આજ શું છે?
આ વહેતા વખતનો ઇલાજ શું છે?
લોહી એક સરખું વહે છે સહુમાં;
તો જુદા જુદા સહુ
સમાજ શું છે?
ખુદા તો હર જગાએ હર ઘડી છે;
પછી નક્કી સમયે
નમાજ શું છે?
મૌનના પડઘાઓ સાંભળ્યા છે મેં;
તો ગુસપુસ થતો અવાજ શું છે?
દરબદર ભટકતો કરી દે માણસને;
નવા નવા આ રસમ રિવાજ શું છે?
હર હસીન ચહેરા પર એક
નકાબ;
નકાબ તળે લપાયેલ લાજ શું છે?
મોહની માયા છે આપણી જિંદગી;
તો પછી માયાની મોહતાજ શું છે?
રેતીમાં હંકારી અમે નાવ ઇશ્કની;
કિનારે ડૂબ્યું જે એ જહાજ શું છે?
સહુ કેદ છે પોતપોતાનામાં નટવર;
હર કોઈ જે ચાહે એ સ્વરાજ શું છે?
ટિપ્પણીઓ નથી:
ટિપ્પણી પોસ્ટ કરો
આપના હર સુચનો, કોમેન્ટસ આવકાર્ય છે. આપનો એ બદલ આભારી છું