કોઈ આંખોમાં રણ લઈને મળે;
તો કોઈ ત્યાં ઝરણ લઈને મળે.
જે મને વીસરવાનો પ્રયત્ન કરે;
એ જ મારું સ્મરણ લઈને મળે.
ગોધૂલી થવા આવી છે હવે તો;
કોઈ યાદોનું ધણ લઈને મળે.
અંતિમ શ્વાસ વિશે વિચાર્યું કદી?
જન્મ જ કદી મરણ લઈને મળે.
લાખ લાખ લોકોમાં રહ્યો એકલો;
કોઈક જાણીતો જણ લઈને મળે.
ઝાંઝવાંના સરોવર જો છલકાવ્યા;
તો સૌ ઇચ્છાનું હરણ લઈને મળે.
હવે ઊંઘાડો પડી ગયો હર શખ્સ;
એ ત્વચાનું આવરણ લઈને મળે.
એ રાહ પર કદી ન જવું યાર જ્યાં;
હર કોઈ થાક્યા ચરણ લઈને મળે.
શું લખવું? શેના વિશે લખવું
હવે?
કાશ! કોઈ નવું કારણ લઈને મળે!
કોને બતાવે એના જખમ નટવર?
સહુ એને તાજાં વ્રણ લઈને મળે.
ટિપ્પણીઓ નથી:
ટિપ્પણી પોસ્ટ કરો
આપના હર સુચનો, કોમેન્ટસ આવકાર્ય છે. આપનો એ બદલ આભારી છું