દેશી/પરદેશી

પરદેશમાં વસી દેશને યાદ કર્યા કરે છે
સર્વ સુખો વચ્ચે એ ફરિયાદ કર્યા કરે છે. 

કેમ આવ્યો, ક્યાં આવ્યો, શીદને આવ્યો
સ્વની સાથે હંમેશ એ સંવાદ કર્યા કરે છે. 

સાંભળતો નથી ખુદનો અવાજ એ ક્યારેય
ને અન્યોને શિદ એ સાદ કર્યા કરે છે? 

ભુતકાળને  વિસરી નથી શકતો વર્તમાનમાં
આ જીવતર બસ એ બરબાદ કર્યા કરે છે. 

ફર્યા કરે  છે હવેલીમાં, કોરો રહે એ હેલીમાં
ડોલર/પાઉન્ડનો એ વરસાદ કર્યા કરે છે. 

ભલે નથી સાંભળતું કોઈ આ ‘નટવર’ને
એની તો આદત છે, એ નાદ કર્યા કરે છે.