અનુત્તર છે...

પ્રશ્ન પ્રેમનો ભલે અનુત્તર છે;

હ્રદય પણ કદીક પથ્થર છે.

લાગણીઓની આગમાં બળે;

આ માનવી બહુ સધ્ધર છે.

ઓગળી જઈશ સનમ એમાં;

આગ મારા ઇશ્કની પ્રખર છે.

તારા ગુલાબી ગાલે જે તલ;

એ પ્રભુનો જ એક અક્ષર છે.

આશરો છે દિલ કે નજરનો;

પ્રેમ તો એના પર નિર્ભર છે.

કોણ કેવું છે એ કેમ જાણવું?

હરેક ચહેરા પર બખ્તર છે.

આત્માનું મિલન હોય પ્રેમ;

મનોહર દેહ સાવ નશ્વર છે.

શ્રદ્ધાનો એ વિષય છે દોસ્તો;

પથ્થરમાં ય ક્યાંક ઈશ્વર છે.

આખરી મુકામની વાત કરો;

ચાર બાય આઠની કબર છે.

આ જિંદગી ય એક તખ્તો છે;

ને હર કોઈ અહીં નટવર છે!