ચકચાર કરે...

માણસ તો માણસ છે, બસ એ ચકચાર કરે;

પંખીઓ પાસે ન શીખે, જેઓ મંત્રોચ્ચાર કરે.

લાગણી લાગણી રમે છે શરૂઆતમાં માણસ;

અને પછી માગણી માગણી રમી લાચાર કરે.

એમ તો અઢી અક્ષરને કહેતા કેટલી વાર?

કહેવું કે ન કહેવું? કહેતાં એ બહુ વિચાર કરે.

વા વાયો અને ક્યાંક નળિયું જો સહેજ ખસ્યું;

નાની વાતનાં ય મોટા મોટા સમાચાર કરે.

કદી ન બોલાવશો સનમને મારી મૈયતમાં;

એનો સ્પર્શ છે જ એવો જે પ્રાણ સંચાર કરે.

ઓ ખુદા તારી ખુદાઈને આ તે શું થયું છે?

તું નથી ક્યાંય ને કેમ સૌ તારો પ્રચાર કરે?

ઇશ્કની મીઠી મીઠી વાત ન કર નટવર હવે;

ફાની જહાંમાં ક્યાં કોઈ સાચો પ્યાર કરે છે?