ઇબાદત...

લાગે ભલે સાવ નાની, મોટી બાબત કરી લઉં છું;

એક રડતા બાળને હસાવી ઇબાદત કરી લઉં છું.

કોણ જાણે કયા રૂપમાં ભગવાન ભટકાય અહીંયાં!

જે મળે સામે એ હરેક સાથે ચાહત કરી લઉં છું.

રહ્યો દિલદાર જનમથી જ ને રહીશ એવો સદા;

જગા જો મળે કોઈ દિલમાં,રિયાસત કરી લઉં છું.

નથી ડરતો કદીય હોય જે સાચું એ કહેવા કોઈને;

ખુદ ખુદાનેય એની જ શિકાયત કરી કરી લઉં છું.

દિલ તો બદમાશી કરી લે, દિલ પર કાબુ કોનો?

અવગણી દિલને ક્યારેક હું શરાફત કરી લઉં છું.

યાર દોસ્તની યારી પણ ચકાસતા રહેવું પડે છે;

ક્યારેક જિગરી સાથે પણ અદાવત કરી લઉં છું.

સમય સમયનું કામ કરે,છો વધે સમય સાથે વય;

રાખવા હૈયાને યુવા સુંવાળી શરારત કરી લઉં છું.

જિંદગી છે જ નટખટ, રિસાય જાય વાત વાતમાં;

સમજાવી, પટાવી, મનાવી યથાવત્ કરી લઉં છું.

એમ તો બહુ લાખેણી છે મારી લીલીછમ લાગણી;

જો કોઈ દિલથી માંગે તો હું કિફાયત કરી લઉં છું.

લખતા નથી આવડ્યું નટવરને લખવા જેવું હજુ ય;

બસ ક્યારેક શબ્દો સાથે થોડી કરામત કરી લઉં છું.