આંખો ભીંજાવીને...

ચાલ્યા ગયા એઓ સપનામાં આવીને;

જોતા જ રહ્યો રાહ હું આંખો ભીંજાવીને.

રેખાઓ તો મારી હથેળીમાં જ રહી ગઈ;

લઈ ગયા ભાગ્ય મારું હાથ મિલાવીને.

મજા આવતી હશે એમને તડપાવવાની;

મળે છે એઓ ચહેરો હિજાબમાં છુપાવીને.

ફટાફટ ફૂલો તોડવા તો બહુ આસાન છે;

કદી જોઈ લે દોસ્ત એકાદ ફૂલ ખિલાવીને.

આ દુનિયા જીતવી સાવ સરળ,સહજ છે;

કરજે પ્રયત્ન દોસ્ત,કદી મસ્તક નમાવીને.

એકાદ ઝોકો હવાનો દીવો હોલવી ગયો;

બેઠો છું તન્હાઈમાં તિમિર ટમટમાવીને.

ખોવાય ગયો છું મને શોધતા શોધતા હું;

રોજ વાંચુ એ ખબર અખબાર મંગાવીને.

કબરમાંથી ફરી ઊભો થઈ જશે નટવર;

પુરજો મારી કબરે માટી દોસ્તો દબાવીને.