શું છે?

તું શું જાણે આ ઇશ્કનો મતલબ શું છે?

આ ચાહના શું છે?  આ તલબ શું છે?

મેં તો સનમ, તને જ ખુદા માની છે!

મને નથી જરાય ખબર કે રબ શું છે?

તારા અધર મારા હોઠ સાથે મળવા દે;

જાણ થઈ જશે તને, તારા લબ શું છે?

મારા સીને કાન રાખી સાંભળ તુ કદીક;

દિલમાં તારા થાય એ ધબ ધબ શું છે?

ઇશ્ક તો ઇશ્ક જ છે, ઇશ્ક જ રહેવા દે;

ઇશ્કથી અલગ વળી આ મજહબ શું છે?

જ્યારે જ્યારે જોઈ તને અલગ જ જોઈ;

તારાથી અજાયબ જહાંમાં ગજબ શું છે?

આંખો આંખોમાં કહી દીધી દિલની વાત;

એનાથી ય અદ્ભુત અલગ કરતબ શું છે?

એક સાંજ વિતાવ મારી સાથે કદીક તું;

સમજાવી દઈશ જિંદગીનો સબબ શું છે?

એક વાર આચમન લેશે તો જ સમજાશે;

આંખોમાં મેં માંડેલ આંસુની પરબ શું છે?

તને યાદ કરી કરી લખતો રહે છે નટવર;

સાવ સીધી વાત,એમાં કોઈ ગજબ શું છે?