રાખવી પડશે મારે ભારે સલૂકાઈ;
મેળવવી છે લાગણી પર સરસાઈ.
એકલવાયો છું લાખ લાખ લોકમાં;
ને સાથ છોડી ગઈ મારી પરછાંઇ!
ઇશ્ક કરશે તો જાણ થશે ઓ દોસ્ત;
પ્રેમમાં તો મળે છે હરદમ રુસવાઈ.
ચૂંથાઈ જાય તોય સુવાસ આપે એ;
ફૂલો પાસેથી શીખવી રહી ફકીરાઈ.
ડૂબી જવાય છે કાંઠે આવી ક્યારેક;
હોય છે કિનારે છેતરામણી ગહેરાઈ.
ખુદને છેતરવાનું આસાન નથી યાર;
જોઈશે એમાં ભાઈ તો ભારે ચતુરાઈ.
એ સાથ નથી હવે તો શું થઈ ગયું?
સાથ આપે છે એમણે આપેલ તન્હાઈ.
હારવાનું નક્કી હતું મારું દોસ્ત મારા;
સમયની સાથે જો હતી મારી હરીફાઈ.
નથી છંદ,અલંકાર
કે ભારે વ્યાકરણ;
છે નટવરની નજમમાં નરી સચ્ચાઈ.
ટિપ્પણીઓ નથી:
ટિપ્પણી પોસ્ટ કરો
આપના હર સુચનો, કોમેન્ટસ આવકાર્ય છે. આપનો એ બદલ આભારી છું