વાર લાગશે...

વાત દિલની છે એથી એ લખતા વાર લાગશે;

રાત કેવી રીતે વીતશે? સમજતા વાર લાગશે.

ઘરથી હું નીકળ્યો ત્યારે મયખાનું દૂર ન હતું;

મયખાનેથી ઘર તરફ જતા જતા વાર લાગશે.

એમને મન તો દિલ મારું એક રમકડું જ હતું;

તોડી નાંખ્યું,નવા દિલથી રમતા વાર લાગશે.

આયનાની નજર લાગી જશે આમને આમ તો;

એ ક્યાં જાણે?એને શૃંગાર સજતા વાર લાગશે.

સાવ લજામણી જેવાં છે એઓ,લજાઈ જાય તો;
બહુ ડરું છું હું, મને એમને અડતા વાર લાગશે.

આંસુની કિંમત જાણી છે, માણી છે, વખાણી છે;

એથી યાર,મને દિલ ખોલી હસતા વાર લાગશે.

ઇશ્કમાં ઉન્નતિ છે એની જરા ય ખબર નથી જેને;

એવા એ અન્જાનને પ્યારમાં પડતા વાર લાગશે.

કોઈ નથી, બસ, વહેતી હવા ટકોરો મારી રહી છે;

યુગોથી બંધ રહેલ  દ્વારને ઊઘડતા વાર લાગશે.

કોઈના પર મરી મરીને જ જીવી રહ્યો છે નટવર;

તો ય હજુ એને હતા ન હતા થતા વાર લાગશે.