સાક્ષાત્ થાય છે...

બંધ હોઠોથી ય ઘણી ઘણી વાત થાય છે;

આંખો બંધ કરું તો એ જ સાક્ષાત્ થાય છે.

મારી સાથે પણ કેટલી ય વાર એવું થયું;

સૂર્ય ડૂબે પશ્ચિમે એ પહેલાં રાત થાય છે.

દુનિયા આખી  જીતવી સાવ આસાન છે;

પણ આ ખુદની જાત ક્યાં મહાત થાય છે?

રોજ એમ તો આમને સામને થાય એઓ;

પણ ખરેખર ક્યાં કોઈ મુલાકાત થાય છે?

સોદાઓ દિલના હવે થઈ રહ્યા છે છેડેચોક;

ચારેને ચૌટે હવે એની ય જાહેરાત થાય છે.

અંતનો તંત છોડી ખંતથી મંડી પડ તુ યાર;

ક્યારેક તો અંતથી જ ખરી શરૂઆત થાય છે.

કોઈના પર જી જાનથી મર્યો તો જાણ થઈ;

કથ્થઈ આંખોમાં ડૂબીને આપઘાત થાય છે.

બેઠો છે સજાવી મહેફિલ નટવર ઓ દોસ્તો;

ત્યાં તો કમસીન ખયાલોની ખેરાત થાય છે.