બતાવો...

સનમ, એકાદ વચન તો તમે પાળીને બતાવો;

તમને કોણ દેખાય છે? દિલમાં ભાળીને બતાવો.

તમે કહો, નીકળી જઈશ દિલમાંથી,દિમાગમાંથી;

તમારા વિચારોમાંથી મને કદી ખાળીને બતાવો.

તમારા જ ચરણો જાણ બહાર તમને દેશે દગો;

મારા ઘરથી દૂર જતા રાહે એને વાળીને બતાવો.

ગમતા ગમતા ગમીશ,રમતા રમતા રમી જઈશ;

એકાદ મધુરી  સાંજ મારી સાથે ગાળીને બતાવો.

થઈ જઈશ કુરબાન પાગલ પરવાનાની માફક હું;

એક વાર તમે શમાની જેમ ખુદને બાળીને બતાવો.

જિંદગીભર,ભવોભવ સાથ આપતો રહીશ આપને;

મારા ખભે આપનું શિર એકવાર ઢાળીને બતાવો.

એમ તો ખબર છે મને આપ ધારો એ કરી શકો;

ફક્ત મારા વિના આપ ખુદને સંભાળીને બતાવો.

લખવાનું સાવ રમત વાત છે નટવર માટે સનમ;

બંધ કરી દઈશ,તમે એ માણવાનું ટાળીને બતાવો.