ન કર...

જે ડાળ કદી તૂટવાની જ છે એના પર માળો ન કર;
તું સગપણો અને સંબંધોં સાંધવામાં ગોટાળો ન કર.

માંડ માંડ થયું છે શાંત જળ મારા માનસ સરોવરનું;
વિચારોમાં સાવ અચાનક આવી કાંકરીચાળો ન કર.

વહેવા દે આંસુના ઝરણાંને તારી યાદમાં સતત હવે;
તારા ઊનાં ઊનાં નિઃસાસાથી એના પર પાળો ન કર.

બાદબાકી કે ભાગાકાર જ જો કરવા હોય હેતના તારે;
તો પછી રહેવા દે, ખયાલી સુખોનો સરવાળો ન કર.

સીધો સાદો માણસ જેવો માણસ રહેવા દે નટવરને;
તારી નજરોથી નચાવી નાચ  એને તરગાળો ન કર.