છું......

દાખલો ખોટી રકમનો હું ગણી રહ્યો છું;

સનમ,ઇમારત રેતીની હું ચણી રહ્યો છું.

જે નથી થયા કોઈના ય, ન થશે કદી;

એમને હું મારા પોતાના ગણી રહ્યો છું.

રાતભર વાવતો રહ્યો તારા જ સપનાં;

ને મીઠા મધુરા ઉજાગરા લણી રહ્યો છું.

તને કદી શીખવ્યા હતા પાઠ પ્રેમના;

પ્રમેય પ્રેમના તારી પાસે ભણી રહ્યો છું.

ઓ સનમ તને મનાવવા શું કરું વધુ?

તારા કાજ સૌને હવે અવગણી રહ્યો છું.

મારા મનોપ્રદેશ પર તારું જ રાજ છે;

એ મનોરાજ્યનો ક્યારેક ધણી રહ્યો છું.

એક વાર ભૂલથી સ્પર્શી ગઈ’તી મને;

સંતુરની જેમ હજુ હું રણઝણી રહ્યો છું.

ન પૂછ શું હાલત છે મારી તારા વિના;

હર શ્વાસે શ્વાસે હું ખુદને હણી રહ્યો છું.

વેદના પ્રસવની જનેતા જ માણી જાણે;

રોજબરોજ એક કવિતા જણી રહ્યો છું.

તારતાર થઈ નટવર સંબંધોની ચાદર;

લાગણીના તાણાવાણાથી વણી રહ્યો છું.